Furuskógur er sex deilda leikskóli sem varð til við sameiningu Furuborgar (12.09.86) og Skógarborgar (07.07.69) 1. júlí 2011. Í skólanum eru 6 deildir og þar dvelja að jafnaði 112 börn á aldrinum 1-6 ára. Starfstöðvar eru tvær og til aðgreiningar eru þær kenndar við götuheiti.

Furuskógur v/Áland eru með 60 börn á þremur aldursskiptum deildum, sem heita: Birkilundur,Grenilundur og Skógarlundur

Furuskógur v/Efstaland eru með 52 börn á þremur aldursskiptum deildum sem heita: Dvergasteinn, Álfasteinn og Huldusteinn

Staðsetning skólans er í Fossvogi, nánasta umhverfi er mjög fjölbreytt, leikvellirnir halla móti suðri og er gróðursæld mikil. Í næsta nágrenni er Fossvogsdalurinn, Skógræktin og fleiri staðir, sem börnin kunna vel að meta. Dalurinn er mikil náttúruparadís, iðandi fuglalíf og fjölbreyttur gróður sem börn og fullorðnir kunna að meta sumar, vetur, vor og haust.

Helstu áherslur í starfi leikskólans, er að hafa barnið í brennidepli, veita umhyggju og stuðla að vellíðan barnanna með lýðræðislegum vinnubrögðum, lífsleikni og einstaklingsmiðuðu námi. Skapandi starf, útinám,
örvun lesþroska og efling stærðfræðilegrar hugsunar eru meðal helstu viðfangsefna og miða að því að ýta undir reynslu og virkni barnsins.

Uppeldi og menntun leikskólabarna er samvinnuverkefni allra kennara í leikskólanum, þar sem þeir leggjast á eitt um að skapa börnunum gott, hlýlegt og fræðandi uppeldisumhverfi.
Í leikskólastarfi fléttast saman á ýmsan hátt hugtökin leikur, vinna og nám.

Börn í leikskóla læra fyrst og fremst í leik og daglegu starfi við eðlilegar og áþreifanlegar aðstæður. Líkamleg og andleg umönnun er forsenda þess að börn öðlist öryggiskennd og geti dafnað og lært af umhverfi sínu.

Börn þurfa að njóta sín sem einstaklingar, en jafnframt að læra að vinna saman, eignast vini og öðlast heilbrigða samkennd. Skipulag og búnaður leikskóla á að vekja forvitni barna, efla sjálfstæði þeirra og frumkvæði, virkni, áhuga og gleði. Aðalmarkmiðið er að börnunum líði vel.

Rauður þráður í starfinu er: Sköpun-útinám-lífsleikni

Einkunnarorð leikskólans eru: Vinsemd, virðing og gleði